Vittoriosa Stars

Valletta   3   Vittoriosa.S   0

Kif mistenni, Valletta kkwa­lifikaw għar-rawnd li jmiss tal-MFA 100 League Anniversary Cup meta fis-Centenary Sta­dium, huma għelbu lit-tim tal-Ewwel Diviżjoni, Vittoriosa Stars, bl-iskor ta’ 3-0 bi tliet gowls ta’ Ian Zammit.

Il-kowċ Belti, Ton Caanen, għażel li jserraħ numru ta’ players regolari bħal Andrew Hogg, Edmond Agius, Njongo Priso, Terence Scerri, Jamie Pace u Jordi Cruyff.

L-ewwel azzjoni denja ta’ nota kienet tal-Beltin meta fl-għaxar minuta xutt sabiħ ta’ Dyson Falzon kien mdawwar f’korner minn Henry Bonello.

 L-ewwel azzjoni tal-Istars waslet fl-14-il minuta meta freekick b’saħħtu ta’ Leontin Chitescu għadda ftit gholi fuq il-lasta difiża minn Nicky Vella.

Fid-19-il minuta, Valletta fet­ħu l-iskor meta minn korner qasir fuq il-lemin, Kevin Sammut qassam il-ballun lil IAN ZAMMIT li mill-viċin għeleb lil Bonello.

Man-nofs siegħa logħob, daqqa ta’ ras ta’ Dylan Grima għaddiet fuq il-mimduda biex qabel tmiem l-ewwel taqsima, Zammit tilef ċans faċli b’daqqa ta’ ras mill-viċin.

Sitt minuti fit-tieni taqsima, Valletta għamlu l-iskor 2-0. Kross ta’ Grima mil-lemin, Dyson Falzon pprova jindirizza l-ballun bir-ras fejn sab lil IAN ZAMMIT żmarkat li ma żbaljax.

Gilbert Agius resaq viċin fil-65 minuta b’daqqa ta’ ras oħra minn kross ta’ Steve Bezzina mix-xellug.

F’kontrattakk għat-tim ta’ Winston Muscat, fid-69 minuta, Beppe Muscat qassam tajjeb lejn Henry Makinwa fuq il-lemin iżda x-xutt tiegħu għadda jħakkek ma’ sieq il-lasta.

Tliet minuti wara, minn freekick ta’ Leontin Chitescu, daqqa ta’ ras tajba tas-sostitut Johann Spiteri għaddiet ftit barra.

Madankollu, ħames minuti mit-tmiem, Valletta skurjaw it-tielet gowl tagħhom meta minn freekick ta’ Agius, IAN ZAMMIT għaqqad il-hat-trick b’ daqqa ta’ ras li għelbet lil Bonello.

VITTORIOSA.S: Henry Bonello, Justin Camilleri, Jonathan Xer­ri, Jeffrey Chetcuti, Brandon Bonnici, Beppe Mus-cat, Paul Camilleri (Johann Spiteri 58), Leontin Chitescu, Elton Vella (Lucian Xerri 85), Clayton Micallef (Michael Borg Olivier 65), Henry Makinwa.

VALLETTA: Nicky Vella, Ro­derick Briffa, Steve Bezzina, Luke Dimech, Steve Borg, Gilbert Agius, Dylan Grima, Stefan Giglio (Terence Scerri 78), Ian Zammit, Dyson Falzon (Edmond Agius 69), Kevin Sammut (Justin Grioli 68).

Vittoriosa.S   4    Dingli   1

Vittoriosa Stars pattew għat-telfa li ġarrbu kontra l-istess Dingli Swallows fil-partita mill-Ewwel Round tal-U*BET FA Trophy meta eliminawhom mit-Tazza Anniversarja f’partita li huma kienu l-aħjar tim b’mod speċjali wara t-tkeċċija ta’ Shawn Tellus wara nofs siegħa logħob. Min-naħa tagħhom Dingli fetħu l-iskor kmieni fil-partita iżda mbagħad sofrew ir-rimonta tat-tim mill-Kottonera.

Dingli ħolqu l-ewwel azzjoni wara biss seba’ minuti meta xutt fil-baxx minn qagħda tajba ta’ Andre Rocha da Silva għadda ftit barra. Huma komplew jinsistu u fl-10 minuta fetħu l-iskor meta Kevin Borg twaqqa’ fil-kaxxa minn Clayton Micallef, ir-referee ordna penalty li minnu ANDRE ROCHA DA SILVA ma falliex.

Vittoriosa pprovaw iwettqu reazzjoni u fis-16-il minuta xutt minn barra l-kaxxa ta’ Henry Makinwa għadda barra. Il-logħba kompliet tkun waħda kumbattuta u f’nofs l-ewwel taqsima xutt fil-baxx ta’ Beppe Muscat ġie mxellef minn Shawn Tellus iżda minkejja li l-ballun bidel id-direzzjoni il-goalkeeper avversarju rnexxielu jsalva. Fit-28 minuta Vittoriosa rnexxielhom jagħmlu l-iskor indaqs meta Clayton Micallef ikkrossja lejn Brandon Bonnici, dan kompla lejn HENRY MAKINWA li kkonkluda fix-xibka mill-viċin.

Żewġ minuti wara Vittoriosa marru fil-vantaġġ meta Henry Makinwa ħarab lid-difiża u hekk kif daħal fil-kaxxa twaqqa’ minn Shawn Tellus u r-referee minbarra li keċċa lill-istess difensur ta’ Dingli ordna penalty li minnu LEONTIN CHITESCU ma falliex.

Wara l-mistrieħ l-andament baqa’ l-istess u fit-53 minuta Vittoriosa żiedu gowl ieħor meta xutt mill-viċin ta’ Henry Makinwa stampa mal-mimduda u fit-tentattiv li jikklerja Renato Conceicao tefa’ fix-xibka tiegħu stess. Dan il-gowl naqqas mir-ritmu tal-partita, b’Vittoriosa jibqgħu juru l-aħjar ideat. Filfatt għalkemm Dingli resqu viċin li jnaqqsu l-iskor minn free-kick ta’ Haruna Doda, fid-79 minuta Vittoriosa komplew ikabbru l-iskor meta MICHAEL BORG OLIVIER twaqqa fil-kaxxa minn Etienne Farrugia, għal darb’oħra r-referee ordna penalty li minnu l-istess attakkant ma falliex.

VITTORIOSA.S: H. Bonello, J. Camilleri, C. Micallef, J. Chetcuti (G. Agius, 86’), B. Bonnici, B. Muscat, J. Spiteri (L. Scerri, 82’), L. Chitescu, E. Vella, M. Borg Olivier, H. Makinwa (C. Cachia, 70’).

DINGLI.S: I. Cassar, R. Conceisao, S. Tellus, R. Spiteri (C. Azzopardi, 46’), H. Doda (d. Camilleri, 78’) K. Formosa, D. Cachia, K. Borg, M. Borg, A. Rocha da Silva (E. Farrugia, 46’), D. Zarb.